لاتنقلين الهموم ولا يضيق الصدر

وشفيك متضايقه لا لا تشيلي الكدر
ملعون ابو الضيقه اللي حددت انيابها



لا تنقلين الهموم ولا يضيق الصدر
لا تقتلين الحلوم وتقفلي بابها



ضيقتك يادنيتي تشكل عليه خطر
وبسمتك ياحياتي ما اضحك الا بها



البدر يجلي ظلام الليل وانتي البدر
لومايحب الكواكب ماتحلابها



انتي ومن غيرك انتي حلمي المنتظر
في قربك اقهر عداي وفرق احزابها



شاعرك شاعرهواجيسه غيوم ومطر
تستبشر الارض منها وتنبت اعشابها



شاعريجمل ويتجمل وقلبه حجر
ياما تسائل سبب ضيقتك وش جابها



لوكان عندي عن الموضوع هذى خبر
طلعت ضيقتك ما تجاهلت بسبابها



ما الله خلقني مجرد واحد من البشر
مالي هدف فالحياه ولا احسب احسابها



على الحجر لي اثر وعلى المدر لي اثر
اعرف جميع الطيور وميز اسرابها



شاعر ولي كلمتي لا قلت بيت الشعر
ترقص عيون القصيد وترمش اهدابها



انحت بها من صخر وغرف بها من بحر
ابيات يفصح بها الابكم وغنابها



احضر مع الجن وانا ريس الموتمر
يوم اختطب في منابرها ومحرابها



ان قلت راسي كبر وان قلت راسي صغر
في كل الاحوال كلمه وعرف اعرابها



انا معك مثل ظلك وانتي مالك عذر
تخفين عني الهموم وتدفعي اتعابها



والله وتاالله ان زولك يالغلا لا حضر
اني اشعر اني ملكت الارض وشعابها



زولك من الله يذكرني بنور القمر
قصه تتلمذت فيها وحفظ اكتابها



والله لو الود ودي ماتشيلي القهر
لقطع يمين الكدر لا طال مخلابها



والله لو الود ودي لاخذك فالنظر
وقفل عيوني عليك وطول احجابها



والله لو الله يمتعني بطول العمر
لبعد همومك ودمرها على اعتابها



وشب في قلب من يكرهك نار وجمر
وني لجمد دماهم وحرق اعصابها



ارجوك لا عاد تجين وخاطرك منكسر
اليوم الايام تنسى عشرة اصحابها



يامنيتي كل ما طيفك ببالي خطر
اعرف مدى وقفة الاحباب لحبابها